FAQ

„Astronaut*in fir een Dag“ ass eng Initiativ vun der Luxembourg Space Agency a riicht sech un all déi jonk Leit di op manst 13 Joer al an am Secondaire zu Lëtzebuerg sinn, an déi sech fir de Sujet Weltraum interesséieren. Am Beräich vun der Educatioun ass et eng vun de Missioune vun der Luxembourg Space Agency, fir déi jonk Leit ze motivéieren sech un der Wëssenschaft (Ingenieurswiesen oder Fuerschung zum Beispill) ze interesséieren an hinnen dëse Beräich méi no ze bréngen, andeems Initiative wéi dës oder aner Projeten, déi an Zesummenaarbecht mat der LSA hire Partnerentitéiten (ESERO, Universitéit, Lux Tech School etc.) organiséiert ginn. Bei dësen Evenementer hunn déi Jonk d’Méiglechkeet erauszefannen, wéi eng Opportunitéiten de Weltraum bereet hält. Hei ass et ausserdeem wichteg ze betounen, datt dës Initiativ och fir Student*innen am Beräich Wëssenschaft an Technologie zougänglech ass.

De Fluch fënnt den 28. September 2023 statt. Virdru ginn awer nach Gruppenaktivitéite fir déi 25 Finalist*innen organiséiert.

All Schüler*inne am Secondaire, déi regulär oder professionell an engem ëffentlechen oder privaten Educatiounsinstitut zu Lëtzebuerg ageschriwwe sinn, oder ee Beweis liwwere kënnen, datt si de Secondaire am Homeschooling absolvéieren. Fir datt deng Demande valabel ass, muss du zum Zäitpunkt vum Fluch op manst 13 Joer al sinn an du muss an de Schouljoer 2022/2023 an 2023/2024 am Secondaire ageschriwwe sinn. Am Follgende fënns de e puer Beispiller: Ee Mount firum Fluch ginn ech 19 Joer al an am aktuelle Schouljoer 2022/2023 sinn ech am zweetleschte Joer vum Cycle Secondaire. Kann ech mech mellen? Jo, dat kanns du. Du erfëlls all d’Konditiounen. Ech kréie meng 13 Joer den Dag nom Parabelfluch. Kann ech mech mellen? Nee. All d’Kandidat*inne vum Parabelfluch mussen den Dag vum Fluch op d’mannst 13 Joer al sinn. Wann däi Gebuertsdag awer genau op den Dag vum Fluch fält, kanns du deng Demande erareechen.

Am Fliger ass eng Plaz fir Kandidat*inne mat enger Behënnerung virgesinn, virausgesat datt keng medezinesch Bedéngunge virleien, bei deene vun engem Parabelfluch ofzerode wier. Wann s du interesséiert bass, kanns du eis kontaktéieren, fir ee Gespréich tëscht dengem*r Dokter*esch an der Parabolic Flight Medical Commission ze organiséieren, déi am beschte bewäerte kann, ob deng Participatioun méiglech ass. Wann de medezinesche Bericht et erlaabt, maachen déi Kandidat*innen bei engem spezielle Selektiounsprozess mat.

Jo, d’Kandidatur an d’Participatioun un deene verschiddenen Etappe vum Prozess si gratis.

De Selektiounsprozess vun der Initiativ Astronaut*in fir een Dag orientéiert sech de Selektiounsprozesser deem, déi di richteg Astronaut*inne bei all de verschiddene Raumfaartagencen an der ganzer Welt matmaache mussen. De Prozess ass a 6 Etappen opgedeelt:: 1. Etapp: Kandidatur a Motivatioun 2. Etapp: Logik- a Verständnistester 3. Etapp: Kierperlech Fitness 4. Etapp: Interview 5. Etapp: Medezinesch Untersuchung 6. Etapp: Parabelfluch No der Evaluatioun vun de Kandidaturen, déi an der éischter Etapp erageschéckt goufen, ginn 250 Kandidat*inne fir d’Logik- a Verständnistester selektionéiert. Dës zweet Etapp vum Concours fënnt a Form vun engem Online-Test statt. Du kanns den Test also vun doheem aus oder an denger Schoul maachen. Duerno wäerten 125 Kandidat*inne op hir kierperlech Fitness getest, andeems si kierperlech a motoresch Kompetenztester packe mussen, déi op enger bestëmmter Plaz duerchgefouert ginn. An der nächster Phas ginn deng Kommunikatiounsfäegkeete wärend engem Interview gekuckt. Bis zu 60 Kandidat*inne kënnen un dëser Phas deelhuelen. Bei dësen Interviewen, déi online iwwer eng Plattform, déi spéider kommunizéiert gëtt, stattfannen, gëss du vun enger Jury bewäert. Déi 25 Kandidat*inne mat de beschte Resultater dierfen um Parabelfluch deelhuelen, nodeems si ee favorabelt Resultat bei der medezinescher Untersuchung kritt hunn. D’Luxembourg Space Agency kënnegt un, wien d’Finalist*inne sinn.

Du muss dech iwwer d’Website astronautforaday.lu umellen, wou s du den Umeldungsformulaire fënns. Hei gëss du gefrot, fir e kuerzen CV an en Autorisatiounsformulaire vun dengen Elteren eropzelueden. An engem zweete Schrëtt kriss du ee Link geschéckt, fir ee Motivatiounsvideo opzehuelen. OPGEPASST: Dës zwou Etappe sinn noutwendeg, fir deng Kandidatur bei Astronaut*in fir een Dag ze validéieren. Wann s du den Umeldungsformulaire ofgëss, mee kee Video ophëls, ass däin Dossier onkomplett a gëtt net bewäert.

Den CV ass eng gutt Aart a Weis, fir dech kennenzeléieren a méi iwwer dech Gewuer ze ginn. Wann s du keng Beruffserfarung hues, kanns du däi schoulesche Werdegang beschreiwen an eis vun denge Qualitéiten a Fäegkeeten erzielen, déi an dengen Aen noutwendeg sinn, fir een/eng Astronaut*in fir een Dag ze ginn. Och Hobbyen an aner Aktivitéiten, déi s du gäre méchs, kanns du eis hei presentéieren. Ee klengen Tipp: Mir encouragéieren dech, däi CV esou originell a kreativ wéi méiglech ze gestalten, souwuel wat den Inhalt wéi och d’Form ugeet. Eng A4-Säit geet méi wéi duer.

Den Zweck vum Video ass et, eis ze weisen, wat deng Motivatioune sinn, fir en/eng Astronaut*in fir een Dag ze ginn. Du hues 60 Sekonnen Zäit, fir eis ze erzielen, firwat mir grad dech auswiele sollen an eis ze iwwerzeegen, dech an déi nächst Etapp matzehuelen. Du kanns de Video entweeder op Englesch, Franséisch oder Lëtzebuergesch ophuelen. Ee klengen Tipp: Schwätz kloer an däitlech, a virun allem: Iwwerrasch eis.

Warscheinlech kriss du de Link fir d’Videoopnam net direkt geschéckt, nodeems de den Umeldungsformulaire ofginn hues. Eist Team kuckt fir d’éicht op s du di gestallte Konditiounen erfëlls ewéi z.B. den Alter an den aktuelle schoulesche Werdegang. No dëser Etapp ginn d’Videolinks verschéckt. Dat dauert normalerweis maximal 24 Stonnen, ausserhalb vun de Weekender. Fir dëse Prozess besser ze verstoen, fënns du hei e puer konkret Beispiller: Wann ech de Formulaire am spéiden Nomëtteg, Owend oder an der Nuecht ausgefëllt hunn, wéini kréien ech da mäi Videolink? Du kriss deng Invitatioun, fir däi Video opzehuelen, den nächsten Dag am Laf vum Dag zougeschéckt. Wann ech meng Demande um 7 Auer Moies oder Mëttes fortschécken, wéini kréien ech da mäi Videolink? Et ka sinn, datt s du däi Link den nächsten Dag ongeféier ëm déi selwecht Zäit geschéckt kriss. Ech hu meng Kandidatur Freides oder Samschdes Owes eragereecht, wéini kréien ech da mäi Videolink? Du kriss däi Link deen nächste Méinden. Wann s du de Link fir d’Videoopnam kritt hues, hues du 7 Deeg Zäit, fir de Video opzehuelen a fortzeschécken, fir deng Aschreiwung fir déi éischt Etapp vum Concours ze validéieren. OPGEPASST: Wann s du de Video net an deem Zäitraum eraschécks, ass deng Kandidatur ongülteg a mir kënnen se net berücksichtegen. Wann s du de Selektiounskrittären entspréchs an no 24 Stonnen nom Fortschécke vun denger Kandidatur mat Bestätegung nach kee Link fir d’Videoopnam kritt hues, biede mir dech, eis via de Kontaktformulaire ze kontaktéieren.

Jo. Wann s du fir d’Etapp vun de Logik-Tester ausgewielt gëss, muss jidderee vun denge gesetzleche Vertrieder*innen en zertifiéierten Autorisatiounsformulaire ënnerschreiwen an eng digital Copie vun de respektive Cartes d’identités eraschécken, fir datt s du mam Prozess weidermaache kanns. D’Organisatioun schéckt dëse Formulaire op d’E-Mailadress, déi s du bei denger Kandidatur uginn hues. Wann s du nëmmen ee/eng gesetzlech*e Vertrieder*in hues, muss du nëmmen een ënnerschriwwent Dokument zeréckschécken; wann s du der zwee hues (béid Elteren, zum Beispill), muss jidderee vun hinnen een Autorisatiounsformulaire ënnerschreiwen an eng Copie vun der jeeweileger Carte d’identité eraschécken. Den Autorisatiounsformulaire, inklusiv déi gefrote Beleeger, soll nëmme vun deene Kandidat*inne erageschéckt ginn, déi et an déi 2. Etapp gepackt hunn. D’Autorisatioun soll mindestens zwee Deeg virum Startdatum vun dëser Etapp erageschéckt gi sinn. Wärend dem Selektiounsprozess kann et och sinn, datt een ee Certificat de Scolarité eraschécke muss.

An dësem Fall gëtt d’Luxembourg Space Agency dës Plaz(en) un déi Kandidat*inne weider, déi an der 4. Etapp déi beschte Resultater erziilt hunn; tëschent der 26. an der 35. Plaz. An deem Kader gëtt eng Lëscht mat 10 Reserve-Astronaut*inne publizéiert, soubal d’Finalist*inne fir dës Editioun bekannt sinn.

Dat ass immens bedauerlech an et deet eis Leed. De Selektiounsprozess baséiert op engem Bewäertungssystem, deen d’Auswielkrittären, d’Motivatioun, den Interessi um Weltraum, d’Resultater vun de Logik- a Verständnistester, d’Leeschtung bei de kierperlechen Tester an och d’Kommunikatiounsfäegkeete kombinéiert. D’Evaluatioun vun den Kandidature gëtt an all Etapp mat Respekt, engem Fokus op Inklusioun an Onparteilechkeet vis-à-vis vun de potenziellen Astronaut*inne fir en Dag ausgefouert. Andeems du deng Kandidatur fir d’Initiativ Astronaut*in fir een Dag ofgëss, akzeptéiers du de Risiko, net bei der finaler Auswiel derbäi ze sinn.

Scho bevir de Mënsch an de Weltraum geflunn ass, war et noutwendeg, op der Äerd eng Situatioun nozestellen, wou et keng Schwéierkraaft gëtt, fir esou erauszefannen, ob de mënschleche Kierper iwwerhaapt d’Capacitéit huet, fir sech deene Konditiounen unzepassen an ze iwwerliewen. Als Léisung dofir gouf an de 1950er Jore de Parabelfluch entwéckelt. Parabelflich mat Fligere wéi den Airbus 310 Zero G sinn eng vun de beschten (a praktesch déi eenzeg) Aart a Weis, fir e Mikrogravitatiounsëmfeld mat engem Equipage u Bord ze simuléieren.

Wärend engem Parabelfluch widderhuelen d’Pilot*innen e puer Mol ee bestëmmte Manöver, deen als „Parabolesche Manöver“ bekannt ass, a bei deem et wärend 22 Sekonne keng Schwéierkraaft méi u Bord gëtt. De Parabelfluch ass an 3 Phasen opgedeelt: fir d’éischt erreecht de Fliger eng Geschwindegkeet vun 810 Kilometer an der Stonn. De/D‘ Pilot*in riicht den Airbus A310 Zero G an engem 50°-Wénkel géigeniwwer dem Horizont no uewen aus. Déi gefillte Schwéierkraaft am Fliger ass da bis zu 1,8 Mol méi héich wéi d’Unzéiungskraaft vun der Äerd. Mir schwätzen an deem Fall vun Hypergravitatioun. Dës Phas dauert ongeféier 20 Sekonnen. Duerno kënnt d’Parabel-Phas: wärend de Zero-G-Fliger an d’Luucht geet, reduzéiert d’Crew d’Leeschtung vum Motor a bréngt de Fliger a seng ballistesch Trajectoire. An dësem Ament gëtt et keng Schwéierkraaft méi u Bord vum Fliger an e befënnt sech elo an enger Parabel, an där en 22 Sekonnen am fräie Fall ass. Wann d’Spëtzt vum Fliger an engem Wénkel vun 42° no ënne weist, riicht d’Crew de Fliger lues a lues erëm aus, wärend d’Dréizuel vum Motor nees erhéicht gëtt. D’Passagéier*inne weien dann nees 1,8 Mol méi wéi op der Äerd. No 20 Sekonnen befënnt sech de Fliger nees a senger horizontaler Trajectoire.

Den Airbus A310 Zero G féiert d’Parabelmanöveren, fir déi en entwéckelt gouf, sécher an zouverlässeg duerch. De Fliger ass speziell fir dës Parabelflich equipéiert a gëtt vun erfuerenen Testpilot*inne gesteiert. De Fliger gëtt no engem besonnesche Protokoll ënnerhal, dee speziell fir dës Zort vu Fliger entwéckelt gouf. Bei all Fluch si Crewmemberen derbäi, déi de Passagéier*innen hëllefen, hir Beweegungen ze kontrolléieren an eventuell Kollisiounen ze vermeiden. D’Instrukter*innen an d’Sécherheetspersonal, déi de Fluch begleeden, soen de Passagéier*inne Bescheed, ier d’Schwéierkraaft nees asetzt, fir se zréck op de Buedem vum Fliger ze bréngen a sinn ëmmer do, fir hinnen ze hëllefen, wann et néideg ass. Normalerweis passéiert dës Transitioun awer ëmmer ganz fléissend.

All Persoun iwwer 13 Joer kann um Entdeckungsfluch deelhuelen, dee vum Astronaut Jean-François Clervoy begleet gëtt. Bei de Parabelflich brauchen d’Passagéier*inne keng speziell Ausrüstung oder Fallschiermer – si brauche sech just an der Kabinn vum A310 Zéro G schwiewen ze loossen.

Soubal d’Motore gestart ginn, sëtz du ugestréckt op dengem Sëtz wéi an engem normale Fliger. Nom Start steieren d’Pilot*innen de Fliger an ee spezielle Loftraum, wou d’Parabele geflu ginn. Zesumme mat den anere Membere vun dengem Grupp an dengem/denger Instrukter*in gees du dann an een speziellen Deel vun der Kabinn, wou s du an der Schweerelosegkeet schwiewe kanns. Wärend enger Stonn maachen d’Pilot*innee 15 Parabelen, mat e puer Pausen dotëschent. An där Zäit flitts du 12 Parabele komplett ouni Schwéierkraaft, 1 Parabel, wou s du d’Schwéierkraaft um Mars erliewe kanns (0,38 g) an 2 Parabelen, an deenen s du d’Moundschwéierkraaft entdecke wäerts (0,16 g). Duerno geet et zeréck op d’Äerd an du sëtz dech erëm op deng Plaz, bis de Fliger gelant ass.

Am Géigesaz zu kommerzielle Flich gëtt den Airbus A310 Zero G wärend de Parabelflich vun dräi Crewmembere gläichzäiteg pilotéiert. Ee/Eng Pilot*in kontrolléiert de Wénkel vun der Nues vum Fliger no uewen an no ënnen, wärend een/eng zweet*e Pilot*in d’Ausriichtung vun de d’Flilleken kontrolléiert, fir ëmmer an der Horizontaler ze bleiwen. Deen/Déi drëtt*e Pilot*in sëtzt hannert deenen éischten zwee an ass verantwortlech fir d’Kontroll vun der Dréigeschwindegkeet vum Motor souwéi d’Iwwerwaachung vu verschiddene Fluchparameter: Alarmen, Temperaturen an den Drock. Zesumme këmmeren sech déi dräi Pilot*innen drëm, d’Beschleunegung op allen dräi Achse quasi bei Null ze halen, fir eng Schweerelosegkeet mat enger Genauegkeet vu ronn 0,02 g ze garantéieren.

Et gi verschidde Krankheeten oder medezinesch Konditiounen, déi mat Parabelflich net kompatibel sinn. An der Annex III vum Reglement vun der Initiativ Astronaut*in fir een Dag fënns du méi Detailer doriwwer.

Et ass normal, wann et engem beim éischte Vol an der Schweerelosegkeet schlecht gëtt. Dëst geschitt ongeféier all zéngtem*r Passagéier*in. Fir dat ze vermeiden, huet d’Crew Medikamenter géint Reesiwwelkeet an e puer aner hëllefräich Mesüren. Mir roden de Passagéier*innen, virum Fluch normal Kaffi ze drénken a sech ze entspanen. Wärend de Beschleunegungsphasen um Ufank vum Fluch muss du de Kapp roueg halen, fir dech drun ze winnen, ier de Fliger mat de Parabelen ufänkt. Wann et dir dann trotzdeem nach ëmmer schlecht ass, misst dat gläich eriwwer sinn: déi meescht Leit fille sech besser, nodeems se e puer Minutte gerascht hunn.

Vläicht hues du scho Fotoe vum Airbus Zero G gesinn, wéi e riicht an den Himmel eropflitt oder géi a Richtung Buedem oftaucht. Fënns du dës Biller immens beandrockend? U Bord vum Fliger mierks du an deem Ament guer näischt dovunner, well d’Fënsteren an deem Beräich, wou s du an der Schweerelosegkeet schwiewe wäerts, verdeckt sinn. Hei läis du op enger Schaumstoffmatt a spiers just den Effet vun der Beschleunegung vum Fliger: däi Kierper ass elo duebel sou schwéier wéi op der Äerd, an et fillt sech wärend ongeféier 20 Sekonnen e bësse sou un, wéi wann een op dir leie géif. Du rutschs an deem Ament och net duerch d’Kabinn, mee et fillt sech un, als wäers de um Buedem festgepecht. Wann d’Schweerelosegkeetsphas ufänkt, héiert ee meeschtens am ganze Fliger d’Leit vu Freed an Erstaune jäizen, well d’Gefill vum Schwiewen esou iwwerraschend ass. A wann de Parabelfluch eriwwer ass, gëtt ëmmer vill geklappt a gelaacht.